Jakarta – Anggo di jaman saonari nunga jotjot be binege barita na diluahon sijaga posoposo manang babysitter i anak manang boru ni tuanna. Beha do: ndang na ganggu rohamuna palumehon posoposomuna i tu sijaga posoposo i ditingki mulaulaon hamu?
Asing sian na manangko posoposo adong muse do binege taringot tu sijaga posoposo i na sai mangalehon ubat modom tu dakdanak na pinalumehon tu ibana asa tongtong menak asa unang loja ibana. Adong muse na pasombuhon sioksiok posoposo i.
Marsak jala bohabohaon do roha ni natoras mambege barita haroaon ni sijaga posoposo songon na ginjang. Ala nii asa unang sala todo hamu ingkon botoonmuna do angka aha ma tanda ni sijaga posoposo na roa:
(1) Sai busisason do posoposo i jala ndang lomo rohana mamereng sijaga ibana
Toho do ndang tolap sijaga posoposo pasonanghon roha ni dakdanak i songon pambahen ni natoras ni dakdanak i sandiri. Alai pinomat ingkon aman do panghilalaan ni posoposo di lambung ni sijaga ibana. Molo ndang jumpang i lapatanna na so jonok manang so martinandaan dope si bursok manang sitatap i tu sijaga posoposo i. Manang toho do na so tau do si jaga posoposo mangalehon hasonangan, halasan dohot hedemahon na mansai diharingkothon si minik i.
(2) Sai dihuphupi sijaga posopso i angka aha ma diula manang dialami ibana dohot posoposo i ariari.
Aut sura ndang olo dipaboa si jaga posoposo i ulaonna raphon dakdanak i saleleng holang sian hamu, na tama do sitihaon adong na so tingkos disi. Sude do ama manang ina molo mulak sian marulaon mansai mangharingkothon umbege barita angka aha ma na masa di ianakhonna i saleleng so di jabu nasida. Ala nii molo so tangkas dialusi sijaga posoposo i hamu, lapatanna na so denggan ma ibana marsaor dohot posoposo i manang adong do na dipasemo ibana.
(3) Pajotjothu masa mara tu dakdanak i.
Sasintongna ingkon sai dijamothon jala diondihon sijaga posoposo manang baby sitter i do posoposo na pinalumehon tu ibana. Ndang boi nok mata ibana asa diboto ibana do sude na niula dakdanak i jala tau ibana pasidinghon dakdanak i sian mara. Jadi molo sai masa mara tu dakdanak i, atik na lalap do ibana modom manang holan sai mainondur televisi.
(4) So ditangihon ibana hatamuna
Ingkon masihaposan jala masiurupan do sijaga posoposo dohot natoras ni posoposo i. Alai molo dirajumi sijaga posoposo i na ummalo do ibana sian hamu, nunga ingkon jamot hamu disi. Lam ma molo so dibege jala diulaon ibana be hatamuna.
(5) Sai tarlambat dungo manang bendat ro sijaga posoposo i.
Torop so piga sijaga posoposo na so tinggal raphon tuanna. Molo songon i do sijaga posoposo di hamu, parateatehon ma beha do parangena. Molo jotjot do ibana bendat ro so marala lapatanna na so haposan nama i.
(6) Pajotjothu tardapot ndang ias posoposo i.
Aut ndang malo sijaga posoposo manang babysitter paridihon huhut manggonti baju ni dakdanak i lapatanna nunga porlu ibana sipasohothon. Lam ma molo sai dibereng hamu na dipasombu ibana tonu baju ni dakdanak i manang ala ni hir hodok manang hauseon ni aek. Sasahali porlu do bahenonmu "pangkahap" di jabumuna sandiri laho manulingkiti aha do sasintongna ulaon ni sijaga posopso i saleleng so adong hamu.
(7) Sai margabusi sijaga posoposo i.
Molo hea do tardapot hamu margabus manang manangko sijaga posoposo i unang be lelengleleng tahan hamu ibana di jabumuna, pintor palao ma. Ai palumehonmuna ma ianakhonmuna i tu halak na so haposan? Barani do hamu pasahathon anak na tinubuhonmuna tu halak na sai manggabusi hamu?
_________________________
Kamus: sijaga posoposo (baby sitter), palumehon (mempercayakan), ganggu (cemas), pasombuhon (membiarkan), sioksiok (mencicit seperti anak ayam kehilangan induk), bohabohaon (gusar, kuatir), hademahon (ketenangan), dipasemo (dirahasiakan, disembunyikan), nok mata (tidur lelap), busisason (gelisah), si bursok (si ucok), si tatap (si butet), siminik (bayi), mainondur (menonton), bendat (lambat), haposan (dapat dipercaya), hir hodok (penuh keringat), pangkahap (mata-mata), manulingkiti (menyelidiki).
na nienet sian:
0 comments:
Post a Comment